Consultant's makakampanya

CEBU, Philippines - Mahimo rang makapangampanya ang mga consultants sa Kapitolyo ug mga lokal nga kandidato dinhi sa probinsiya sumala pa ni Provincial Atty. Mariano Martinquilla.

Matud pa niya nga walay tulubagon ang consultants kun may ituboy o ba kaha mangampanya sila pabor kang Gov. Gwendolyn Garcia ug ni Glenn Soco sa pagkagobernador ug pagkabise gobernador sa umaabot nga election ug ubang mga lokal ug national nga kandidato.

Kini tungod kay dili mga empleyado sa gobiyerno ang mga consultants sa Kapitolyo maong walay employee-employer relationship ang mga consultants.

Giklaro hinuon niini nga ang mga ranks and file kun mga kawani sa gobiyerno mao ray mahimong mapasakaan og kasong electioneering kun mangampanya kini sa lokal nga kandidato sa umaabot nga election.

Apan si Martinquilla mitumbok nga wala siya makadawat og reklamo batok sa mga consultants sa Kapitolyo nga giingong nangampanya sa kandidato bisan og wala pa ang election period. (Chester Abadilla)   (BANATNEWS)