Kapitolyo di mohingalan sa mga media gi-monitor

CEBU, Philippines - Ang kagamhanan sa lalawigan sa Sugbu dili na mohingalan sa lima ka mga sakop sa media nga gimonitor sa Kapitolyo tungod sa pagpunay og komentaryo batok ni Gov. Gwendolyn Garcia nga nalambigit sa kalangay sa paggawas sa resulta sa fact finding investigation sa Ombudsman labot sa giingong overpriced nga katukuran sa Cebu International Convention Center sa dakbayan sa Mandaue.

Sumala pa sa tigpamaba sa Kapitolyo nga si Atty. Rory Jon Sepulveda nga dili na kinahanglang hinganlan ang maong mga miyembro sa media aron dili sila mahatagan og importansiya sa publiko.

“Dili na kinahanglan pang hinganlan ang mga sakop sa media nga nagkomentaryo batok sa Kapitolyo kay mosikat nya,” sigon pa ni Sepulveda.

Si Sepulveda nagkanayon usab nga ang naasoy’ng mga media personalities nga gitumbok nga critical kaayo batok sa Kapitolyo giingong milurang na sa pag-atake ug wala na mohisgot sa isyu (CICC).

Ang katukoran sa CICC nga proyekto sa Kapitolyo alang sa pagpahigayon sa 12th ASEAN Summit niadtong 2007 kasamtangang giimbestigar sa Ombudsman tungod sa pasangil nga overpriced kini.

Gumikan kay si Garcia man maoy gobernador nasentro kini karon sa maong isyu. Ang mga sakop sa media nasagmuyo human nagdumili na paghatag og kalamboan sa imbestigasyon ang Ombudsman Visayas ug gipasa kini ngadto sa Ombudsman Manila.

Dunay migawas nga mga report nga giingong gi-pressure sa Kapitolyo si Deputy Ombudsman for the Visayas Pelagio Apostol kabahin sa pagpagawas og mga pamahayag o kalamboan sa dagan sa maong imbestigasyon, butang usab nga gipanghimakak sa Ombudsman sanglit tua na sa Manila ang pagpagawas sa desisyon kabahin niini.

Ang Kapitolyo miklaro nga wala nila gi-pressure ang Ombudsman ug wala silay gahom pagmando niini kung unsay buhaton kabahin sa imbestigasyon.

Ang Kapitolyo gumikan sa padayong pagduki-duki sa media sa maong isyu mihulgang mopasaka og reklamo batok sa mga tigbalita tungod sa padayong paglambigit sa pangalan sa gobernador kabahin sa ‘gag order’ diha sa Ombudsman.

Gihimakak usab sa Kapitolyo nga nakaapekto na sa kandidatura sa gobernador kinsa subling mopapili karong eleksyon ang maong isyu apan giingong naapektahan gyud hinuon ang ilang pagpaabot sa basic services ngadto sa publiko gumikan kay duna nay pagduda ang publiko sa kagamhanan sa lalawigan.

Dili mominus lima ka mga media personalities dinhi sa Sugbu ang giingong gimonitor sa Kapitolyo ug posibling pasakaan og kasong libelo o kaha reklamo sa Kapisanan ng mga Brodkaster sa Pilipinas (KBP) ug asosasyon sa prensa tungod sa pagbalikbalik sa isyu sa kalambigitan sa gobernadora sa kalangay sa pagpagawas sa resulta sa imbestigasyon sa CICC nga milanat karon og 4 ka tuig.

Samtang ang gitudlong spokesperson sa Ombudsman Visayas nga si Assistant Ombudsman Virginia Palanca Santiago mibutyag nga wala pa mahuman sa Ombudsman Manila sa pagtimbang-timbang kun angayan bang pasakaan og kaso ang mga opisyales sa Kapitolyo sa giingong overpriced nga katukuran sa CICC. -  BANAT NEWS