CCPO 'nasakit' sa mga pamahayag sa banay sa gipatay'ng piskal

CEBU, Philippines - Ang pangulo sa kapulisan sa dakbayan sa Sugbu Sr. Supt. Patrocinio Comendador mipadayag nga mahimong moduol ang mga kabanay ni anhing piskal Patrick Osorio sa laing ahensya sa pagpadayon sa paggukod sa mga kriminal sa pagpatay niini.

 Kini human siya masagmuyo sa mga report nga ang ubang kaliwat ni Osorio mipadayag nga wala sila matagbaw sa gihimo sa Cebu City Police Office nga milanat na og usa ka tuig.

 Matud pa niini nga mamahimong ang tanang records sa kaso ingon man pagpadayon sa hot pursuit operation sa lain pang suspek ilang ihatag sa bisan unsang ahensya sa goberno kun maoy gusto sa pamilyang Osorio.

 Gipadayag niining wala sila matulog sa maong kaso sanglit nagpadayon sila sa paggukod sa laing suspek ug gani niadtong milabay’ng semana naka-eskapo kini atol sa ilang operation sa probinsya sa Bohol.

 Giklaro usab niining duna sila’y komunikasyon sa pamilyang Osorio labot na sa kaso ug wala nila katulgi.

 Sumala pa niini nga sila sa kapulisan mi-konsiderar nang sulbad ang maong kaso human ilang nadakpan ang usa sa suspetsadong si Allan Senogat ug napasaka na ang kaso ngadto sa korte.

 Misimpatiya hinuon sila sa kabanay ni Osorio nga emosyonal kun motubag sa mga pangutana sa media apan alang kaniya nga salikwaot nga paminawon ang mga pamahayag nga wala sila matagbaw sa performance sa trabaho sa CCPO sa maong kaso. - Guam Logroño (BANAT NEWS)