Pharmacy gilungkab, ATM apil sa giguba

CEBU, Philippines — Usa ka pharmacy nga nahimutang sa may North Road Barangay Jagobiao, Mandaue City ang gilungkab kagahapon ug apil sa giguba ang ATM nga naa sulod sa botika.

Girespondihan sa kapolisan ang maong insidente human mitahu ang manager sa maong pharmacy diin nasuta nga ang mga suspek nisulod pinaagi sa pagbangag sa bongbong sa luyong bahin sa edipisyo.

Suma pa ni Police Lt. Col. Mercy Villaro ang tigpamaba sa Mandaue City Police Office nga gihimo na nila ang backtracking sa CCTV Camera ug gibana-bana nga 3 ngadto sa 5 ka tawo ang nihimo sa pagpanglungkab.

Ang mga empleyado sa maong botika nga motambong sa ilang trabaho alas 6 sa buntag maoy nakadiskubre sa nagpasad nga mga tipaka sa ATM nga gituohang giguba sa mga kawatan gamit ang bara de kabra.

Nasuta nga nakakuha og kuwarta ang mga kawatan apil na ang mga grocery nga baligya sa pharmacy.

Subay sa maong hitabo, si Police Colonel Enrico Figueroa, Acting City Director sa Cebu City Police Office nimando sa mga station commanders nga mohimo og inventory sa ilang Area of Responsibility sa mga establisamento. Hinoon, ang Cebu City Police Office wala'y na-monitor nga naabot na sa siyudad ang grupo nga naghimo sa pagpangawat sa pharmacy sa dakbayan sa Mandaue apan gihimug-atan ni Col. Figueroa nga dili sila mokompiyansa ug mohimo sila og assesment.

Makigtagbo sab sila og balik sa mga security managers nga una na nilang gibuhat sa milabay'ng buwan. — Romeo T. Limpangog, Decemay Padilla (BANAT NEWS)