Kagawad gikulata
CEBU, Philippines — Usa ka Barangay Kagawad sa Alang-Alang sa dakbayan sa Mandaue ang nisang-at og reklamo sa Police Station 1 Mandaue City Police Office(MCPO) niadtong Martes sa kadlawon, Hunyo 3, 2025.
Ang nisang-at og reklamo mao si Noel Quimque, residente sa SB Cabahug Street, Ibabao-Estancia, dakbayan sa Mandaue. Ang iyang gireklamo mao si Ian Luigi Cortes ug duha niini ka mga kauban.
Matud pa sa biktima samtang natulog na siya sa ilaha gitawgan siya sa cellphone sa maong suspek aron siya pagawason kay duna silay estoryahan.
Apan sa dihang nakagawas na siya nasuko matud pa si Cortes ug dunay duha ka tawong nagsakay og motorsiklo nga kalit mihapak og helmet sa luyo sa iyahang ulo. Pagkahuman niini, siya mipasangil nga gisumbag siya ni Cortes sa makadaghang higayon hinungdan sa naangkon niyang bun-og ug samad.
Sa dihang naalarma na ang mga tawo, nag-iyahay og ikyas ang mga suspek apan nabiyaan nila ang motorsiklo ug usa ka cellular phone. Matud niya dili kini ang unang higayon nga gisulong siya ni Cortes, kay giadto sab siya niini diha sa ilang balay sa wala pa ang eleksyon apan wala siya didto anang tungora.
Nagsugod matod pa ang bangi nila tungod sa usa ka Facebook post ni Quimque nga wala mauyoni matud pa sa suspek. (BANAT NEWS)
- Latest
