Nasakmita'g 28 ka pakiteng shabu nakonbikto

CEBU, Philippines -  Gikonbikto sa korte ang usa ka drug pusher human kini masakmite og 28 ka pakite nga shabu atol sa gihimong pagpangronda sa kapolisan niadtong Enero 28, 2006 didto sa Sitio Dita, barangay Pulang-bato siyudad sa Sugbu.

Ang gikonbikto ni RTC-7 branch 13 Judge Meinrado Paredes sa kasong paghupot ug pagbaligya og ginadiling drugas mao si Romeo Jumao-as Jr., 29 anyos, ulitawo, usa ka first year high school ug usa ka piggery helper, nga taga sitio Dita.

Si Judge Paredes misilot kang Jumao-as Jr. sa pagkabilanggo sulod sa 20 ka tuig ug pagbayad og P400 mil nga multa.

Sumala pa ni Judge Paredes nga lig-on kaayo ang mga ebidensiya sa prosecution nga   naglangkob sa 28 ka pakite nga shabu nga mitimbang og 11.27 ka gramos, chemistry report, police blotter, search warrant ug ubang mga drug paraphernalia.

Matud pa ni Paredes sa iyang upat ka pahina nga desisyon nga dili siya makatuo sa panghimakak ni Jumao-as nga matud pa kalit lang siyang gisikop sa kapolisan sa iyang paggawas sa balay.

Nasayran nga ang kapolisan sa siyudad sa Sugbu mironda sa balay ni Jumao-as nga nagdala og usa ka search warrant nga giluwatan sa huwes sa RTC -7 branch 13 ug nasakmit ang 28 ka pakite sa shabu, mga drug paraphernalia , kwarta ni Jumao-as nga gibutang sa basement sa balay niiini nga gitumbok sa kapolisan nga gihimo nang drug den. - Chester Abadilla (BANAT NEWS)