Gwen way donasyon sa Sinulog, mosayaw gihapon

CEBU, Philippines - Bisan pa man sa kagrabeng panagbingkil sa politika tali sa kagamhanan sa siyudad sa Sugbo ug sa Kapitolyo, si Gov. Gwendolyn Garcia mipahibalong mosayaw gihapon siya sa Sinulog karong tuig 2010.

Matud pa ni Garcia nga dili mahimong babag ang ilang panag-away political ug personal ni Cebu City Mayor Tomas Osmeña aron lang dili siya makasayaw sa Sinulog karong tuiga.

“Kini tungod kay ang pagsayaw sa Sinulog Mardi Gras nahimo na nakong tinuig nga saad ug halad alang sa Santo Niño,” matud pa sa gobernador.

Si Garcia mosayaw kuyog sa “Ani-anihan Tribe” sa lungsod sa Tabuelan, nga nahimong second placer sa Festival of Festivals sa lalawigan sa Sugbu sa miaging tuig.

Dihang gipangutana ang gobernadora nganong mao kini ang grupong iyang gipili, ang gobernadora nagkanayon nga nakauyon siya sa maong tribu tungod kay ang mga dancers mga bata ug nagsimbolo sa Balaang Bata nga si Señor Santo Niño.

Gawas niini, ang gobernadora miingon nga ang tema sa maong sayaw nahaom usab sa tinguha sa kagamhanan sa lalawigan nga mao ang kalambuan sa kalungsuran.

Matud pa sa gobernadora nga usa ka hagit ang alang kaniya ang pagsayaw sa maong grupo tungod kay bisan og mga bata kusog ug paspas kining mosayaw.

Samtang gitataw ni Garcia nga dili na siya mohatag pa og donasyon ngadto sa Sinulog Foundation aron idugang sa premyo ug galastuhanan alang sa Sinulog Mardi Gras karong tuig 2010.

Gipasabot sa gobernadora nga niadtong miaging tuig, ang Sinulog Foundation nag-atubang og problemang pinansyal tungod kay ang mga negosyante sa siyudad sa Sugbo nagdumili sa paghatag og dagkong kantidad nga sponsorship.

Kini tungod sa epekto sa global financial crisis sa milabay'ng duha na ka tuig hinungdan nga ang Kapitolyo midonar og P2 milyones   sa naasoy'ng foundation.  – BANAT NEWS