Nakakita sa cocaine may ganti

CEBU, Philippines - Girekomendar ni Dangerous Drugs Board Acting chairman Atty. Paul Clarence Oaminal ngadto sa Malacañang nga pahatagan og ganti kadtong mga mananagat nga boluntaryong mi-turnover sa 208 ka kilong cocaine diha sa Northern ug Eastern Samar sa milabay’ng semana.

Si Oaminal personal nga misuwat ngadto ni Presidente Gloria Arroyo nga nagsugyot nga pahatagan og tagsa ka sakong bugas humay sa matag kilo sa cocaine nga gitahan sa maong mga mananagat.

Ang maong mga cocaine gituuhang gihagbong sa usa ka barkong padulong sa Hongkong, nagtuo ang DDB nga posibleng dunay mo-pickup niini nga mga drug syndicates dinhi sa Pilipinas apan nabulilyaso.

Si Oaminal misuwat ngadto kang Presidente Gloria Arroyo nga ang paghatag sa maong ganti makapadasig ngadto sa uban nga dunay kasayuran ug dunay gitagoan nga gidiling drugas susama sa cocaine pagtahan niini ngadto sa mga awtoridad.

Gawas sa bugas, buot ni Oaminal nga pahatagan og plaques of appreciation ang maong mga mananagat tungod sa gipakitang pagkamatinud-anon niini sa nasud.

Samtang mipadala sab og listahan sa mga pangalan si Oaminal ngadto sa Presidente sa mga sakop sa Philippine Drugs Enforcement Agency (PDEA-8) ingon man Police Regional Office (PRO-8) nga maoy miabag pag-recover sa gipang- turnover nga 200 kilos nga cocaine sa mga mananagat sa Boronggan Eastern Samar.  - Darrel Carumba (BANAT NEWS)