CEBU, Philippines - Mikabat sa pito ka lantaka ang nasakmit sa mga polis niadtong Lunes sa gabii gikan sa mga batan-ong migamit niini sa ilang giyera-giyera sa barangay Tabunok.
Si Superintendent Henry Binas, hepe sa Talisay City Police Station sa pakighinabi sa Banat News kagahapon mibutyag nga daghan siyang nadawat nga reklamo kabahin sa mga batan-ong magduwa-duwa og lantaka ug nakahatag og kahasol ngadto sa ubang mga tawo tungod sa kalangas niini busa napugos sila sa pagpahigayon og kalihukan aron sa pagsumpo maong mga matang sa pabuto.
Sa unang semana niining buwana nakasakmit usab ang kapolisan og upat ka lantaka.
Gibutyag ni Supt. Binas nga ang paggamit og lantaka nagbutang sa dakong peligro sa kinabuhi sa mogamit niini ug bisan sa mga tawo nga anaa sa palibot ilabi na sa mga motorista kay gumikan sa kasipa sa buto niini makugangan ug mahaigking ang drayber sa motorsiklo nga mosangpot na hinuon sa disgrasya.
Midugang si Supt. Binas nga gawas sa disgrasya makamugna usab kini og away ilabi na kun anha kini pabutha atubangan sa tawo nga balahan og lata o kaha bato. - BANAT NEWS