11 ka tawo sikop, 7 ka makina sakmit

CEBU, Philippines - Onse ka tawo ang nasikop ug pito ka illegal gambling machines ang nasikop sa gipahigayon nga saturation drive sa Investigation and Detection and Management Branch (IDMB) usa niini usa ka British National sa barangay Duljo Fatima sa miaging gabii.

Gironda sa IDMB ang sitio Micabajo sa nahisgutang barangay nasikop ang upat ka tawo human kini naaktuhan nga nagkupay-kupay sa pitsas sa mahjong.

Laing nadakpan diha sa sitio Sto. Niño ang tulo usab ka tawo nga naaktuhan nga nagkalingaw og duwa og mole-mole lakip na ang usa ka British national nga si Simon Buxon,31, ug nila ni Joel Pagusara, 49, Ariel Mirasol Cotiangco, 23.

Upat usab ka mga paketeng shabu ang nasakmit gikan ni Servano Quijano diha sa sitio Vampire sa nahisgutang barangay human siya mabatyaging kadudahan ang lihok ug dihang girekisa nakuha kaniya ang maong ilegal nga drugas.

Nasikop usab ang tulo ka tawo sa ilang paglaroy-laroy sa maong lugar nga sila si Geff Luis Guinalig, taga Basak Pardo, Artemio Dumios, molupyo sa barangay Inayawan ug Vilma Parantar nga molupyo sa Bulacao-Pardo.

Ang mga nasikop kasamtangang nagtingkagol sa karsel sa Cebu City Police Office samtang nagpaabot kini sa kasong ipasaka batok kanila. – BANAT NEWS