Joavan Fernandez mi-plead not guilty

CEBU, Philippines - Mi-plead not guilty si Joavan Fernandez sa kasong illegal possession of low powered firearm nga giatubang niini atol sa arraignment sa MTCC sa dakbayan sa Lapulapu sa milabay'ng adlaw.

Si Fernandez nasikop niadtong milabay'ng bulan sa Septiyembre ning tuiga sa mga sakop sa Highway Patrol Group-7 human kini nakalapas sa lagda sa trapiko gumikan sa iyang pagpatingog sa siren ug blinkers sa iyang sakyanan sa dakbayan sa Mandaue nga nakakawat sa atensyon sa awtoridad.

Ang kapolisan nagduda dayon sa mga sakay sa Pajero nga gimaneho ni Joavan gumikan kay hanap ang plaka niini maong ilaha kining gigukod hangtud sa Mactan-Cebu International Airport.

Atol sa paghiling sa iyang sakyanan nakita ang kalibre .38 ug mga buhing bala ug ginadiling drugas sa sakyanan ni Fernandez lakip na ang mga kagamitan sa pagsuyop niini hinungdan sa pagkasikop niini uban sa iyang upat ka mga higala.

Nakapiyansa si Joavan sa mga kaso kabahin niini ug karon padayong gawasnon.

Sa milabay'ng adlaw gipahigayon ang arraignment sa kaso niini sa MTCC atubangan ni Hon. Judge Allan Garciano ug mipadayag sa iyang ka-inosente kalabot sa maong gipasangil kaniya.  -  BANAT NEWS