CEBU, Philippines - Gikonpirmar sa kadagkoan sa kapolisan sa dakbayan sa Sugbo nga adunay bigtime robbery group gikan sa Mindanao nga nangabot dinhi sa Sugbu aron mo-operate panahon sa Pasko.
Si Sr. Insp. Michael Anthony Bastes, hepe sa Theft and Robbery Section (TRS) sa Cebu City Police Office (CCPO) nagkanayon nga nakadawat sila og report nga niadto pang miaging semana nangabot dinhi sa Sugbo ang lima ka mga tulisan nga sakop sa karaang grupo sa mga tulisan sa Mindanao nga nakapanulis na dinhi sa Sugbo kaniadto.
Matud pa ni Bastes nga gipahibalo siya niini sa ilang impormante kagahapon lang sa buntag human masigpati ang lima ka tulisan. Nagtuo sila nga manulis ang grupo dinhi sa dakbayan sa Sugbo karong adlaw’ng Pasko.
Tungod sa maong impormasyon, nakig-coordinate gilayon si Sr. Insp. Bastes sa iyang mga kontak didto sa Mindanao aron sa pagsusi sa pagka-tawo sa mga sakop sa grupo. Apan ang impormasyon gikan sa iyang kontak sa Mindanao nagkanayon nga tua sa kauluhan ang grupo sa mga tulisan. Laing report nagkanayon nga atol o human na sa Sinulog manulis ang maong grupo dinhi sa Sugbo. Kini ang hinungdan nga mihimo sila og hugot nga pagpaniid sa maong mga tulisan. (Guam P. Logroño) (BANATNEWS)