Urban poor sa Mandaue nagsaulog

CEBU, Philippines - Malampuson ang kasaulogan sa ika-21 nga Urban Poor Solidarity Week nga gitambungan sa kaliboan ka mga miyembro sa urban poor sa dakbayan sa Mandaue sa miaging Domingo.

Uban sa tema nga   “Pag-ampo ug Lihok Bansayon. Balay ug Yuta Maangkon. Kinabuhi ta Malamboon!” migahob sa kasadya sa mga nanambong nga sakop sa nagkadaiyang hugpong sa urban poor ang sulod sa Mandaue City Cultural and Sports Complex sa sitio Tribunal sa barangay Centro sa maong dakbayan.

Gihatagan og kinabuhi ang maong kasaulogan pinaagi sa nanambong nga mga kadagkoan sa nagkalainlaing ahensya sa kagamhanan sama sa   Philippine Commission on Urban Poor (PCUP), National Housing Authority (NHA) Housing Urban Development Council, Department of Energy and  Natural Resources (DENR) ug uban pa.

Si Engr. Randolph Librando nga maoy manager sa Community Home Mortgage Finance Corporation nagkanayon nga nagpadayon ang ilang pagpatuman karon sa programa alang sa mga kabus nga katawhan sa nagkadaiyang dapit dinhi sa rehiyon.

Dugang pa niya nga daghan na kaayo ang nakapahimulos sa programa sa kagamhanan nga nagpautang og salapi ngadto sa mga kabus alang sa ilang kapuy-an.

Si Mayor Jonas Cortes ug mga sakop sa konseho mitambong usab sa maong kalihokan.

Gipasalig sa mayor nga hugtanon siyang mosuporta ug mobulig sa tanang kalihokan sa kahugpongan sa urban poor alang sa ilang kalamboan sa pagpuyo ug panginabuhi. – BANAT NEWS