Dili na pabalunan kwarta ang mga tinun-an

CEBU, Philippines - Giawhag sa mga sakop sa Hunta Probinsiyal ang mga ginikanan nga dili hatagan og kwarta ang ilang anak nga tinun-an aron makaduwa sa mga internet cafés atol sa tingklase.

Si Bokal Juan Bolo mipalabang og resolusyon nga nag-awhag sa mga ginikanan nga monitoron ug disiplinahon ang ilang mga anak pinaagi sa paghunong paghatag og allowance nga kwarta aron di sila matintal og sulod sa mga internet cafés.

 Matud pa ni Bolo posibleng nakaapekto na karon og maayo sa mga tinun-an ang mga internet games sa pagtuon sa kabataan kay inay mogahin og igong panahon sa pagtuon sa leksyon nagpunay na hinuon og duwa sa internet.

 Si Bolo mibase sa iyang kabalaka sa pagtuong gihimo sa Asian Institute of Journalism and Communication niadtong bulan sa Abril ning tuiga nga nagkanayon nga 46 porsiyento sa mga tinun-an mogasto og dili mu-minus P300 matag bulan sa pagduwa og online games sa internet.

 Matud pa ni Bolo nga sa maong pagtuon napamatud-ang kadaghanan sa mosulod sa internet café mga estudyante sa elementarya sa pribado ug publikong tulunghaan sa Luzon, Visayas ug Mindanao.

 Ang nakapakurat sa maong pagtuon mao nga ang mga tinun-an moduwa   sa online games sa internet cafés sagad makalugar o mangawat-kawat niini atol sa tingklase ug human na sa klase hangtud na sa tungang gabii samtang ang uban sa sayo sa kaadlawon na moundang sa pagduwa.

 Dugang pa ni Bolo nga angayan nga ang mga ginikanan modisiplina sa ilang mga kabataan labot sa paggasto sa mga allowances niini ug pag-usik sa panahon sa pagduwa lamang og online games.

Gisugyot hinuon ni Bolo nga tudloan sa mga ginikanan ang mga anak sa pagtigom ug paggahin og igong panahon sa pagtuon sa mga leksyon sa eskuylahan. - Chester Abadilla (BANAT NEWS)