Mga Liberal sa Sugbo dunay tambag gikan sa coordinator

CEBU, Philippines - Giawhag sa coordinator sa Liberal Party sa dakbayan sa Sugbo nga si Atty. Aristotle Batuhan ang mga kandidato sa Sugbo, nagsuporta o wala sa kandidatura ni Senador Noynoy Aquino sa pag-apil sa panawagan pagpa-resign kang Pres. Gloria Macapagal-Arroyo.

Si Arroyo misang-at na og certificate of candidacy pagka-kongresista sa ikatulong distrito sa Pampanga. Labaw nang giawhag ni Batuhan ang standard bearer sa Liberal sa lalawigan nga si Hilario Davide III ug ni Bise Mayor Michael Rama, ang standard bearer sa maong partido sa dakbayan sa Sugbo.

Si Batuhan mipasabot nga angayan moapil sila sa panawagan pagpa-resign o pagpasang-at og leave of absence kang Arroyo, sama sa gibuhat ni Aquino.

Gipadayag niini nga kini maoy pagsukod sa liderato nilang Davide ug Rama kun unsa sila ka sinsero sa pagsuporta sa kandidatura ni Noynoy ug dili lang pagsakay sa popularidad sa senador. Si Aquino maoy nanguna sa mga survey sa mga presidentiable, samtang si Senador Mar Roxas usab maoy nanguna sa survey sa mga vice presidentiable.

Nabantayan ni Batuhan nga human manawagan si Aquino, nagpakahilom lamang silang Davide ug Rama.

Alang kaniya kun mohimo og pamahayag si Davide ug Rama batok kang Arroyo, makapahanaw kini sa pagduda nga misakay lamang sila sa pagkasikat ni Aquino. Kini tungod kay dili ikalimod nga ang maong mga opisyal daan nga kaalyado sa administrasyon sa milabay’ng siyam ka tuig. – BANAT NEWS