CEBU, Philippines - Gipahimangnoan karon sa Comelec sa siyudad sa Sugbu ang mga politiko nga magpapili sa umaabot nga eleksyon nga sigurohong kompleto ang mga rekisitos sa pagduso unya niini sa ilang Certificate of Candidacy (COC).
Partikular nga gipasidan-an ni City Election Officer Attorney Marchel Sarno mao kadtong mga kandidato nga unya na sa deadline mosumiter sa ilang certifico de kandidatura.
Kini aron dili mag-problema ang ilang COC ug posibleng dili na hinoon mahinayon sa ilang katuyoan nga magpapili sa umaabot nga eleksyon.
Lakip sa angayang sigurohon sa mga kandidato mao ang notaryo sa ilang COC, ID picture, ug certificate of nomination kung adunay partido.
Ang buhatan ni Sarno maoy gitahasan pagdawat sa tanang COC sa mga kandidato nga magpapili sa dakbayan alang sa piniliay sunod tuig.
Gitataw sa City Election Officer nga dili niya dawaton ang COC kung dunay kuwang sa rekisitos, hinungdan nga karon pa lang iya nang gipasidan-an ang mga kandidato.
Midugang si Sarno nga dili usab siya muhatag ug lugway sa higayon nga muhagtok na ang tungang gabii sa Disyembre 1 nga maoy deadline pag-file ug COC.
Sa kasamtangan, duha pa lang ka independenting kandidato ang nakaduso sa ilang COC ngadto sa buhatan sa Comelec sa dakbayan sukad niadtong Nobyembre 20.
Kini mao ang nangangkong whistleblower nga si Crisologo Saavedra nga magpapili pagkamayor, ug ang usa ka Nestor Legaspi nga magpapili pagkakonsehal sa siyudad.
Ang laing nipadayag nga magpapili pagkamayor nga si kanhi senador John Henry “Sonny” Osmeña mipahibawo nga karon nang Sabado moduso sa iyang COC.
Samtang ang igsoon ni Mayor Tomas Osmeña nga si Georgia nga interesado usab nga magmayor sa dakbayan, unya na sa Martes sa buntag mo-file sa iyang certifico de kandidatura.
Nasayran nga ang oposisyon sa siyudad nangayo na og porma sa COC sa Comelec, apan wa pa matino kung kini kanus-a nila iduso ngadto sa maong buhatan.
Sa pikas bahin, gipahibawo ni Mayor Osmeña nga unya na usab sila sa hinapos nga bahin moduso sa ilang COC aron dili na makamaniobra ang ilang kontra. - Elly Bolonos (BANAT NEWS)