CEBU, Philippines - Namatay ang usa sa tulo ka mga Koreano nga nalumos didto sa Moalboal beach resort niadtong Martes sa buntag.
Ang nabugtoan sa kinabuhi ug wala na makaabot sa tambalanan mao si Eok Soo Kim. Si Kim ug ang duha niya ka kauban nga sila si Seok Baek ug Kim Sung Hee nangaligo didto sa Moalboal beach nianang alas 11:00 sa buntag gumikan sa pagdapit sa ilang higala ug tag-iya sa usa ka diving shop sa maong lugar nga nailhan lang nga James.
Usa sa mga piniyalan ni James nga si Fritz Georfo maoy nagdala sa pumpboat ug gipasakay niini ang tulo ka mga Koreano nga kompleto na og mga diving gear sama sa oxygen ug uban pa, paingon ngadto sa lawod aron adto didto pasawma.
Sa dihang didto na sila sa dapit nga layo-layo na sa baybayon, nangambak dayon sa dagat ang tulo apan matud pa ni Georfo nga nakurat siya kay mikalit lang og tunga si Hee nga nagkapakapa ug nagpakitabang kaniya.
Samtang gitabang niya si Hee, maoy iyang naalinggatan nga nalumos usab ang mga kauban niini nga si Baek ug si Soo.
Hinuon nasalbar si Baek sa laing kuyog ni Georfo samtang si Soo nawad-an na og panimuot hinungdan nga gihatod dayon nila kini sa Badian District Hospital apan gideklarar kini nga dead on arrival.
Samtang ang duha gihatod dayon sa usa ka pribadong tambalanan sa dakbayan sa Sugbo.
Si Inspector Roland Yballe nagkanayon nga ang posibleng hinungdan sa pagkalumos ug pagkamatay sa biktima mao ang oxygen apan padayon pa nilang giimbistigar ang maong hitabo.
Sa laing bahin usa ka tawong epileptic napalgang patay na nga naglutaw sa dagat didto sa Seaside Alumnos, barangay Basak-Pardo kagahapon sa ala 1:00 sa hapon.
Ang lawas patay ni Michael Cabosas, 37, nga taga barangay Cogon, nakit-an ni Johnriel Dallares usa sa mga molupyo sa maong lugar kinsa namingwit niadtong tungora.
Ang iyaan sa nalumos mibutyag sa kapolisan nga may sakit nga epileptic ang iyang pag-umangkon nga maoy malagmit hinungdan sa pagkalumos niini.
Gisuta sa kapolisan ang patay’ng lawas ni Cabosas ug wala sila’y nakitang timailhan nga kini gipatay og tuyo. – BANAT NEWS