CEBU, Philippines - Samdan sa ulo ang usa ka construction worker dihang gipusil kini sa tawo nga iyang gisagpa didto sa Sitio Carajay, Brgy. Gun-ob dakbayan sa Lapulapu kagahapon sa kadlawon.
Ang biktima mao si Noel Patalinghug, 27, ulitawo, nagtrabaho sa konstruksyon nga taga Carajay.
Si SPO1 Honorato Inihao sa Crime Against Persons mibutyag sa Banat News nga namiyesta sa ilang silingan si Patalinghug dihang nanagpa kini sa laing bisita sa iyang silingan sa walay igong hinungdan. Si Patalinghug nga wala'y kalibutan nga puwerting sukoa sa iyang gisagpa, nalingaw og inom sa ilimnong makahubog uban sa iyang mga higala sa balay nga iyang gipamiyestahan.
Dihang nagsusapinday na kini ug buot nang mopauli, giatngan kini sa iyang gisagpa uban sa laing duha ka higala niini.
Gitarget gyud ang bagolbagol sa biktima apan nakalihay kini ug dyutay hinungdang didto mapisok ang bala ubos sa iyang dunggan.
Gihatod dayon kini ngadto sa Vicente Sotto Memorial Medical Center sa dakbayan sa Sugbo samtang ang miluthang kaniya midiretso og sibat.
Sa pagkakaron padayon pang gipangita sa kapolisan ang kriminal samtang ang mga tigpaniid nagkanayon nga peligro na kaayo karon ang modiretso lang og panagpa bisan wala'y hinungdan. - BANAT NEWS