CEBU, Philippines - Nailhan na sa kapolisn ang mga sakop sa sindikato nga maoy mi-salvage sa duha ka mga Koreano nga gilabay niadtong Domingo sa barangay Uling, lungsod sa Naga.
Si Chief Supt. Lani-O Nerez, direktor sa Police Regional Office (PRO-7) mibutyag nga ang lider nga giingong maoy mipatay sa duha kauban ang laing Koreano. Samtang ang drayber nga taga-Talisay gikatahong nasikop sa mga ahente sa National Bureau of Investigation (NBI-7).
Matud pa ni Nerez nga ang lider sa sindikato nakabiya na sa Sugbo paingon sa usa ka nasud sa Asya, samtang ang laing Koreano nagpabilin pa dinhi.
Si Nerez miingon nga ang lider sa dakong grupo sa Korea nag-atubang og dagkong mga kaso sama sa swindling ug pagnegosyo og surplus nga mga sakyanan sa usa sa mga dapit sa habagatang lalawigan sa Sugbo.
Giklaro ni Nerez nga nakahipos sila og impormasyon nga nasuko ang lider sa Mafia nilang Choi Ho Sun ug Yang Soon Suk tungod sa pagsamoksamok sa duha pinaagi sa pagpangilkil sa ilang mga kaubanan sa South Korea.
Apan ang nakapatay nilang Choi ug Yang nagtagotago dinhi sa Sugbo tungod kay gipangita usab kini didto sa South Korea tungod sa mga kasong giatubang niini, samtang ang duha nangabot usab dinhi.
Sumala sa taho nga lakip ang lider sa Mafia nasuko nga gikilkilan og kuwarta nilang Choi ug Yang ug gipangayoan pa gyud og kotse. Sa dihang mibalibad ang lider, gihulga kining i-report sa International Police (Interpol).
Silang Choi ug Yang nakigkita sa lider sa Mafia sa usa sa mga establisamento sa IT Park ug didto sila katapusang nakit-an.
Giklaro niini nga gitukod niya ang task force nga gipanguluhan ni Sr. Supt. Melvin Ramon Buenafe sa Regional Intelligence Division (RID) ug PNP-Crime Laboratory.
Padayon ang pakig-alayon sa kapolisan ngadto sa mga otoridad sa South Korea pagsulbad sa maong kaso. – BANAT NEWS