Pacman himuong adopted son sa Cebu

CEBU, Philippines - Si Provincial Board Member Victor Maambong mosang-at og resolusyon karong adlaw’ng Lunes paghimong “adopted son” sa lalawigan ang gibansagang Pambansang Kamao nga si Manny ‘Pacman’ Pacquiao.

 Matud pa ni Maambong nga dugay na unta siyang nagplanong mopalabang sa maong resolusyon niadtong nakalabay pang mga away ni Pacquiao apan naunhan lamang siya sa konseho sa siyudad sa Sugbu ug dili siya buot nga masaypan nga nanundog lamang sa siyudad.

 Si Maambong nagkanayon nga nakadayeg siya sa pagkamainampuon ug pagkamahiubsanon ni Pacquiao nga maoy usa sa mga hiyas sa mga Sugbuanon.

 Matud pa ni Maambong nga sa dili pa moduwa ug sa pagtapos na sa duwa ilabina og modaug ang Pambansang Kamao, si Pacquiao dili gyud malimot sa pagluhod sa iyang corner aron sa pag-ampo sa Labaw nga Makagagahom.

 Sigon pa ni Maambong nga angay usab nga himuong “adopted son” sa probinsiya si Pacquiao tungod kay ang kaliwat sa amahan niini taga lungsod sa Pinamungajan sa probinsiya sa Sugbu.

 Nagtuo si Maambong nga sa duwa karong adlawa ni Pacquiao batok ni Puerto Rican boxer Miguel Cotto, si Pacquiao maoy mogawas nga mananaug.

 Iyang gitataw nga gawas sa kapaspas ug kakusog sa kumo ni Pacquiao, nakita usab niini ang kagrabe sa pokus ni Pacquiao sa training alang sa maong sangka.

 Apan gitataw ni Maambong nga kun madaug man o mapildi si Pacquiao niining away niya batok kang Cotto, iya gyud nga ipadayon ang pagpalabang sa maong resolusyon. (Chester Abadilla)    (BANATNEWS)