Birhen sa Regla: Nobernaryo sa Lapulapu malinawon - Lapu police

CEBU, Philippines - Nagmalampuson ug nagmalinawon ang fluvial procession kagahapong adlawa nunot sa unang adlaw sa nobenaryo sa kapistahan sa Mahal nga Patron sa dakbayan sa Lapulapu ang Birhen sa Regla.

 Sa wala pa sugdi ang fluvial procession sa BSR unang gipahigayon ang Santos nga Misa sa Our Lady of the Sacred Heart sa Marigondon parish church nga giselebrar sa kura paruko nga si Fr. Cerilo "Boy" Asister.

 Human niini uban sa mga devotees nagmotorkada padulong sa Pacific Cebu Resort sa barangay Subabasbas alang sa fluvial procession luwan sa M/B Magdaragat uban sa 80 ka mga sakyanan sa dagat nga misalmot sa maong kalihukan.

Ang prosesyon sa dagat miagi sa Marigondon, Agus, Maribago, Punta Engaño dayong liko padulong sa Muelle Osmeña wharf, wala hinuoy nasinating problema sanglit linaw ang dagat.

Makita usab ang mga manindot nga dekorasyon sa mga pumpboats nga nag-indigay alang sa makakuha sa tulo ka mga ganti sa duha ka kategoriya diin ang indigay sa mga pumpboat sa mga hotels ug restaurants diin gilahi usab ang indigay sa mga pumpboats sa kabarangayan sa dakbayan sa Lapulapu. Ang mga sakop usab sa Philippine Air Force ingon man usa ka abyon sa usa ka pribadong tunghaan nangsabwag og mga bulak.

Gisugat nila ni Lapulapu City First Lady Paz Radaza ug mga konsehales sa dakbayan ug mga relihiyosong grupo ang Patron ug giprosesyon sa simbahan.

Libuang mga debotos gikan sa nagkadaiyang dapit ang mikuyog sa maong kalihukan. Ang mga debotos nagtuong milagrosa ang Patron sa Lapulapu gumikan sa mga hangyo ug pangamuyong natinuod human sila mamahimong deboto niini.

Samtang sa habig sa kapolisan gikalipay usab ni Lapulapu City Police Office Director Sr. Supt. Mariano Natuel Jr. nga way mga dagkong panghitabo may kalambigitan sa maong kalihukan. -  BANAT NEWS