CEBU, Philippines - Ang mamumuno sa managsuong drayber sa traysikad niadtong Lunes sa gabii gipanid-an karon sa kapolisan sa dakbayan sa Talisay.
Si Superintendent Henry Binas, hepe sa Talisay City Police Station sa pakighinabi sa Banat News kagahapon nagkanayon nga ila nang gipanid-an karon ang mipatay sa magsuong Danilo ug Ernesto Mitra .
Si Binas kinsa wala mobutyag sa ngalan sa maong tawo, nagkanayon nga ang kriminal buot unta nilang imbitahon apan misibat dayon kini.
Sa nahisgutang insidente wala pay mga saksi nga mitumaw busa naglisod sila sa ilang imbestigasyon tungod kay ang mga tawo sa maong lugar dili mo-cooperate sa kapolisan.
Ang hepe sa kapolisan sa siyudad nagkanayon usab nga si Danilo usa ka ex-convict ug usa sa ilang gilantaw karon nga hinungdan sa maong hitabo mao ang pagpanimalos.
Apan ang manghod niini nga si Ernesto walay dautang record sa kapolisan sa dakbayan.
Ang pagpatay sa managsuong Mitra nahitabo samtang nagparking sila kay nagpaabot og mga pasahero. - Brenda D. Batuto (BANAT NEWS)