Nograles mipasalig may bag-ong budget para 2010

CEBU, Philippines - Gipasalig ni House Speaker Prospero Nograles nga may bag-ong budget   nga maaprobahan ang kongreso alang sa sunod tuig.

Kini samtang giplantsa na ang pagsagop sa P1.541 trilyones nga gahin alang sa tuig 2010. Ang maong balaodnon nakapasar na sa ikaduhang pagbasa sa kongreso ug anaa na sila sa pagtuki niini alang sa ikatulong pagbasa.

Sayo niini daan nang gipasalig sa house speaker nga dili mahimong karaang budget ang ipatuman sa nasud samtang nasaksihan sa tanan ang grabeng kadaot nga nahiagoman sa kaliboan ka mga pamilya sa Luzon gumikan sa mga katalagmang nasinatian sa maong bahin sa nasud.

Miingon si Nograles nga ang kadaot nga naghingapin dili lamang sa kabtangan sa mga molupyo kundi bisan sa mga butang nga iya sa kagamhanan sama sa mga karsada, mga taytayan ug daghan pa kaayong infrastraktura.

Sa katalagmang nasinatian sa taga Luzon , si Nograles nagkanayon nga kinahanglang maghiusa ang katawhan ug ang kagamhanan inabagan usab sa mga hinabang sa taga gawas , aron batokan ang kakabus ug pagprotiher sa kalikopan sa nasud.

Hinuon sa bahin ni Kongresista Junie Cua kinsa maoy chairman sa committee on appropriations kini nagkanayon   nga ang labing dako og pahat sa budget karong sunod tuig mao nang social services sector nga gigahinan og P479.9 bilyones.

Matud pa ni Cua nga niining gahina, ang P235 bilyones mahiadto sa edukasyon ug manpower, ug ang P101 bilyones mahiadto sa social security and welfare services.

Matud pa ni Nograles nga makalaum ang katawhang Pilipino sa mga magbabalaod sa nasud nga motutok kini sa ilang gipanumpaan sa paghatag og ayuda nga masalbar ang nasud ug makabangon gikan sa daghang kaalaotan nga nahiaguman niini sa natad sa panginabuhi, kalinaw ug kahusay ug sa dagan sa politika. (Wen Celen)  (BANATNEWS)