CEBU, Philippines - Ipatawag karong buntag sa Land Transportation Office (LTO)-7 ang kadagkoan sa Ceres Bus Company gumikan sa sumbong nga overloading.
Si LTO-7 Assistant Regional Director Ed Catarungan mibutyag sa Banat News kagahapon nga usa ka pasahero sa Ceres bus maoy mireklamo sa ilang buhatan kay matud pa niadtong Nobyembre 2 sa hapon milanat og unom ka oras ang biyahe sa Ceres paingon dinhi sa dakbayan gikan sa habagatang bahin sa lalawigan sa Sugbu tungod sa sobrang kapuno niini sa pasahero o overloading.
Matud ni Catarungan nga mireklamo ang maong pasahero kay puwerte kunong huota nila ug nagbarog nalang sila sa sulod sa sakyanan, may nagyaka sa sawog ug gisinghag-singhagan pa sila sa drayber ug konduktor.
Gipasabot ni Catarungan nga wala sa katarungan ang maong drayber ug konduktor ug gani nakalapas sila sa ilang franchize agreement.
Matud pa ni Catarungan nga silotanan kining mga tawhana (drayber ug konduktor) og labing menus pagkasuspenso sa lisensya sa drayber sa higayon nga mamatud-an kining sad-an sa ilang imbestigasyon.
Hinuon maayo nalang kay niadtong kalag-kalag walay mga dautang panghitabo sa kadalanan matud pa ni Catarungan. - Rey B. Pasaporte (BANAT NEWS)