Dan sa menteryohan sa Mandaue di paagian og sakyanan

CEBU, Philippines - Ang mga dalan paingon sa menteryo sa barangay Guizo sa dakbayan sa Mandaue tak-opan karong adlawa ug ugma atol sa kasaulogan sa Adlaw sa mga Santos ug Adlaw sa mga Kalag.

Si Domingo Cortes, media liaison sa Traffic Enforcement Agency of Mandaue (TEAM) mibutyag sa Banat News nga ang pagpatak-op sa maong mga dalan ilang gihimo aron sayon ra sa mga tawo nga moadto sa menteryohan aron mamisita sa lubong sa ilang mga minahal sa kinabuhi.

Matud pa niya nga magtinabangay ang mga traffic enforcer ug barangay tanod sa Guizo ug Mantuyong sa pagbantay sa kadalanan sa maong mga lugar alang sa pagpatuman sa kahusay ug kalinaw sa duha ka adlaw nga kalihokan.

Si Senior Superintendent Orlano Ualat, director sa Mandaue City Police Office (MCPO) mipahimangno sa katawhan sa maong dakbayan nga likayan ang pagdala og hinagiban ug mga ilimnong makahubog sa ilang pagsulod sa menteryohan.

Gipasabot niya nga ang pagdili sa pagdala og hinagiban ug ilimnong makahubog sulod sa menteryo gitumong aron kalikayan ang kasamok ug mga dautang panghitabo sa panahon sa kasaulogan. – BANAT NEWS