CEBU, Philippines - Talandugon ang kahimtang ang usa ka ginang ug anak niining babaye human gipang-unay og dunggab sa iyang banang hubog nga human masukong gilabanan sa ginang ang apo niini diha sa sitio Guiwanon sa barangay Poblacion lungsod sa Dalaguete niadtong Biyernes sa alas 6:00 sa gabii.
Ang mga biktima mao si Cristina Celerio Dinggal, 68, ug anak niining si Maribel Dinggal Gonzales, 44, pulos mga molupyo sa nahisgutang lugar.
Samtang naputos sa bun-og ang kalawasan sa suspek nga si Vicente Dinggal, 68, asawa ni Cristina human kini gitabangan og kulata sa mga kabanay ug silingan tungod sa iyang gibuhat sa iyang pamilya. Matud ni PO3 Christopher Requina sa Dalaguete police dihang nahinabi sa Banat News ang suspek giingong miabot nga hastang huboga ug nasuko sa iyang apo nga anak ni Maribel tungod sa giingong pagpabadlong niini.
Apan gikatahong gidapigan ni Cristina ang apo hinungdan nga miresulta kini sa panag-away nilang magtiayon ug nianang tungura kalit milanit og pinote ang suspek ug dayon giduslak ang kapikas diha sa dughan niini.
Si Maribel pagkakita sa gibuhat sa iyang amahan sa iyang inahan daling mipatunga aron pugngan ang gibuhat niini apan hasta kini giapil og duslak sa suspek diha sa tiyan ug sa walang bahin sa bukton. Tungod sa komosyon, daling miabot ang ilang mga paryente ug silingan ug gitabangan pagbukbok ang suspek hangtud nga kini nadisarmahan ug gi-turn over sa mirespondeng kapolisan.
Ang manag-inahan gidala sa Dr. Ildefonso Alcantara Memorial Hospital sa lungsod apan tungod sa ka peligroso sa ilang kahimtang gibalhin sila sa Vicente Sotto Memorial Medical Center.
Ang kapolisan nangandam na sa kasong attempted parricide batok sa suspetsadong pabiling gitanggong sa karsel sa maong lungsod. - Guam Logroño (BANAT NEWS)