Alimaong gipahimangnoan sa gun ban

CEBU, Philippines - Gipasidan-an sa kapolisan sa dakbayan sa Mandaue ang mga sakop sa Supreme Council of Datu Alimaong Tribe Jagobiao Chapter sa barangay Jagobiao nga sikupon ang ilang mga sakop nga magdala og armas ug mahait nga hinagiban atol unya sa implementasyon sa Comelec Gun Ban.

Kini ang giluwatang pahimangno ni Mandaue City Police Office Director Sr. Supt. Orlando Ualat sa pakighinabi sa Banat News.

Si Ualat uban ni Jagobiao barangay kapitan Editha Montesa nakigdayalogo sa mga sakop sa tribu sa maong dapit gumikan sa taho nga ang mga miyembro niini adunay gipanghuptang mga armas ug mga mahait nga hinagiban nga yano ra kaayo nilang dala-dalahon.

Apan ang mga miyembro sa maong tribo nagdumili kini sa pagsanong sa hangyo sa kapolisan apan misaad nga atol unya sa gun ban walay magdala og armas mobuto sa ilang mga sakop.

Gipasabot sa mga miyembro sa Alimaong nga alang kanila legal ang ilang paghupot sa ilang armas diin ilang gihimong ehemplo ang midaog nilang kaso sa korte sa dakbayan sa Lapulapu.

Usa sa ilang miyembro ang nasikop kini gumikan sa paghupot og armas apan nagmadaugon kini sa kaso gumikan sa ilang kultura nga gisubay isip sakop sa tribu sa Alimaong.

Gumikan niini tun-an pa ni Ualat ang maong kaso nga gihimong basehanan sa maong tribu sa legalidad sa ilang paghupot og armas ug pagtiner sa mga mahait nga hinagiban.

Samtang giawhag ni Ualat ang mga nanag-iya og armas nga walay lisensiya o mi-expire na ang lisensiya apan di na gustong magtinil niini sa paghagbong nalang sa mga armas sa mga boxes nga ilang gibutang sa matag police stations sa Mandaue.

Kini samtang giawhag niya ang mga nagtinil og armas nga pahimuslan ang amnesty program karon pagpalisensya sa ilang armas hangtud Oktubre 31.

Matud pang Ualat, kadtong mga nahibaw-an nang dunay gitinil nga mga armas apan wala magpalisensya ilaha unyang rondahon aron sakmiton ang maong mga armas. - Bong Soriano uban sa report ni Romeo Limpangog (BANAT NEWS)