Mga polis pahulipan og tanod

CEBU, Philippines - Tanang mga sakop sa kapolisan sa lungsod sa Consolacion pahulipan ni Mayor Avelino Gungob og mga barangay tanod aron maoy mobantay sa kahapsay ug kalinaw sa ilang lugar.

Ang pangulo sa kapolisan sa lalawigan sa Sugbo, Sr. Supt. Jesus Gaquing, nagkanayon nga nadawat niya ang suwat sa mayor niadtong Sabado nga naghangyong iyang pahulipan ang tanang mga polis sa iyang lungsod. Si Gaquing miingon nga imposibleng mahitabo ang tinguha sa mayor tungod kay ang Philippine National Police kabahin gyud kini sa mga lokalidad.

Gikatahong nasagmuyo si Gungob ngadto kang Gaquing human isalikway niini ang request sa mayor nga dili pa-relibohan ang duha ka mga police nga sila si PO1 Peralla ug PO3 Ruben Alin.

Si Gaquing mipasabot nga gipa-relibuhan niya sila si PO1 Peralla ug PO3 Alin gumikan kay duna kini kasong giatubang, apan nagdumili siya sa pagbutyag kun unsang kaso ang gikalambigitan sa duha.

Gitambagan hinuon ni Gaquing ang hepe sa Consolacion, Sr. Insp. Bonifacio Tecson nga mopakita gyud og respeto sa mayor aron mahimong ehemplo sa mga sakop niini.

“Wala ko mainsulto aning laraw ni Mayor Gungob nga barangay tanod maoy ihulip sa mga pulis diha sa ilang lungsod. Ang ako lang nga gihimo nako ang akong trabaho duna man gud nay kasong mga polisa nga iyang ipabilin,” sumala pa ni Gaquing.

Gipasabot niini nga dili nalang siya makiglalis sa mayor ug ang iyaha nalang iduso sa Police Regional Office (PRO-7) ang gustong mahitabo sa mayor.

Sumala pa niini nga bisan paman niini magpadayon ang maayong serbisyo sa kapolisan diha sa maong lungsod.

Hinuon gi-respeto niini ang tinguha sa Mayor tungod kay iyaha kining kaugalingon prerogative samtang sila sa kapulisan ang mopadayon usab sa ilang mga maayong programang nasugdan.

Mapasalamaton hinuon sila sa mayor tungod kay bisan paman niini aktibo kining misuporta sa kapulisan sa ilang kampanya batok krimen diha sa lungsud sa Consolacion. (BANATNEWS)