CEBU, Philippines - Walay supak si Mandaue City Mayor Jonas Cortes sa proyektong Light Rail Transit (LRT) ug Bus Railway Transit (BRT) nga tukoron dinhi sa Metro Cebu tungod kay maayo kining proyekto alang sa transportasyon.
Matud pa ni Cortes nga usa ka maayong proyekto ang nahunahunaan nila ni Kongresista Eduardo Gullas sa unang distrito sa lalawigan sa Sugbu nga LRT ug sa BRT nga plano usab ni Cebu City Mayor Tomas Osmeña gumikan kay makagaan kini sa dagan sa trapiko ug sa mga trabahador dili na malangay pa sa ilang tagsatagsa ka trabaho.
Apan kinahanglan kining lingkuran sa mga opisyales sa mga dapit nga maapektuhan niini ilabi na sa dakbayan sa Mandaue nga daghang mga proyekto unya ang maapektuhan.
Gipasabot ni Cortes nga kinahanglan makita una nila ang plano niini kun asa moagi gumikan kay dunay nagpadayong proyekto sa dakbayan sa Mandaue ang "Land and Development Project" nga anaa na sa stage 4 sa ilang himoong implementasyon diin delikado nga maapektuhan sa maong proyekto.
Matud pa ni Cortes mas maayong sa sayo pa mahibaw-an na nila ang mga dapit nga maapektuhan aron sila makapangandam daan ug makahimo og laing alternatibo sa ilang pagahimuong proyekto.
Apan si Osmeña nag-ukon ukon sa pagsuporta niini apan ning bag-uhay lang mipadayag nga iyahang paminawon una ang kinatibuk-ang plano tungod kay sa pagkakaron mas pabor kaniya ang BRT tungod kay mas barato ug menos ang gastos sa maintenance. (Bong Soriano) (BANATNEWS)