Lady Fiscal gireklamo sa langyaw

CEBU, Philippines - Laing kaso na usab ang gipasaka batok sa kontrobersyal nga piskal ug kanhi Bureau of Immigration Hearing Officer nga si Mary Ann Castro ang gipasaka diha sa buhatan sa Ombudsman tungod sa pasangil nga kini nangilad ngadto sa usa ka Pilipinang naminyo og langyaw.

Usa ka Reyna Duerme Fisk, taga barangay Cogon, Pardo, dakbayan sa Sugbo mipasangil nga niadtong Disyembre 6, 2007 mibiyahe siya ug ang iyang duha ka tuig nga anak ngadto sa Amerika ug mibalik sila nganhi sa Pilipinas niadtong Enero 14, 2008.

Niadtong tungora wala mabutangi og marka nga arrival stamp sa mga immigration officer sa Ninoy Aquino International Airport ang passport sa iyang anak maong miadto sila sa BID-7 aron iproseso ang visa extension sa ilang anak ug nangayo sila og panabang sa usa ka tigbalita nga mao usab ang mi-refer kanila ngadto kang Castro.

Matud pa ni Fisk nga si Castro miingon ngadto sa iyang bana nga si Jeffrey Stephen Fisk nga overstaying na ang status sa ilang anak nganhi sa Pilipinas pero makatabang siya niini.

Si Fisk mipasangil nga gipangayoan sila ni Castro og P80 mil apan ila kining nahangyo ngadto sa P30 mil ug gikuha ni Castro ang passport sa ilang anak aron matatakan og “Balik Bayan.”

Nianang adlawa gihapon nila gibalik og hatud ang salapi apan tungod kay wa si Castro ila kining gibilin sa staff niini nga si Normie Mante, dihang gipangayoan nila og resibo giingnan sila niining pabalikon sunod adlaw aron hatagan sa resibo ug mauli ang passport sa bata.

Tuod man nabalik kanila sunod adlaw ang passport apan wala gihapoy resibong gihatag.

Ang pamilya mibiya balik ngadto sa Amerika ug dihang nabalik niadtong Oktobre 1, 2009 miadto sila sa BID aron mo-apply og dual citizenship alang sa bata apan nakugang sila nga giingnan silang di na kinahanglan kay dinhi gipanganak ang ilang anak sa Pilipinas kay mahimo ra kini direktang maka-apply og Philippine passport.

Tungod niini gibati og kasagmuyo ang reklamante nga giilad sila sa usa ka public official (Castro) hinungdan nga misang-at sila og reklamo sa Ombudsman.

 Si Castro dihang nahinabi sa Banat News mihimakak sa pasangil sumala pa niya siya pay mitabang kang Fisk aron paubsan ang penalty tungod sa overstaying sa iyang anak

Si Castro nagkanayon nga gi-refer niya si Fisk ngadto sa immigration cashier ug gikwentahan sa bayranan nga administrative fine ug interest penalty sulod sa 15 ka buwan nga overstay sa iyang anak nga miabot P50,000 ngadto P60,000 apan nangangha siya sa reklamong miabot man ngadto sa P80 mil.

Si Castro midugang nga dihang mibalik si Fisk sa iyang buhatan didto siya sa Manila ug ang mi-assist kang Fisk sa pagproseso sa transaksiyon niini si Mante. Ang gidalang citizenship sa bata “American” sumala pa ni Castro.  (Brenda D. Batuto)   (BANATNEWS)