Robbery with rape sa Lapu NBI ug CIDG na maoy mopadayon sa imbestigasyon

CEBU, Philippines - Gitugyan na sa kapolisan sa dakbayan sa Lapulapu ngadto sa National Bureau of Investigation ug Criminal Intelligence and Detective Group ang imbestigasyon sa kasong paglugos ug pagpangawat sa usa ka empleyado sa MEPZ nga nahitabo sa milabay’ng semana sa barangay Pusok dakbayan sa Lapulapu.

Base sa nasayran sa Banat News sa Womens and Children’s Desk ug sa Crime Against Property sa kapolisan sa Lapulapu   nga dili na sila makapanghilabot sa imbestigasyon sa maong kaso.

Matud pa ni SPO3 Editha Patalinhug mipadayag ang amahan sa 24 -anyos nga biktima nga midangop na kini og laing ahensiya alang sa padayong imbestigasyon dili na sila makahatag og dugang impormasyon kalabot niini.

Samtang si SPO1 Danilo Aying ug PO3 Elmer Canillo mitug-an sa Banat News nga ang NBI-7 ug CIDG-7 nangayo na kanila sa mga detalye may kalambigitan sa maong kaso.

Matud pa ni PO3 Canillo gumikan sa maong kalamboan wala mahinayon ang paghimo og cartographic sketch sa suspetsado aron mahulagway kini sa biktima kung iyang makita pag-usab.

Pipila ka mga notadong kawatan usab sa maong dapit ang ilang gipatawag alang sa pag-ila sa biktima apan negatibo pagtumbok sa biktima.

Kahinumduman nga sa milabay’ng semana usa ka empleyado sa MEPZ biktima sa pagpanglungkab ug gilugos sa wala mailhing tawo sulod sa giabangang lawak. - Bong Soriano (BANAT NEWS)