VECO wa mamaligya'g energy saver devices

CEBU, Philippines - Mipasidaan ang Visayan Electric Company (VECO) ngadto sa mga konsumidor nga wala sila’y gitugotang mamaligya og “energy saving devices” kini human sila makadawat og reports nga dunay mga tawong namaligya niini ug nagtanyag sa mas baratong presyo kun itandi sa presyo sa “energy saver devices” sa VECO.

Ang information officer sa Veco nga si Ethel Natera miklaro nga wala sila’y gitahasang kompaniya, organisasyon o indibidwal aron mamaligya og energy saver devices.

Gidasig ni Natera ang publiko nga kun duna man gani mahibaw-an nga dunay namaligya ug nagtanyag niini mahimo mopahibawo kanila pinaagi sa pagkontak sa ilang hotline 230-VECO (8326) alang sa dugang pakisusi.

Gani padayong gidasig sa Veco ang mga konsumidor nga magdaginot paggamit sa kuryente kun wala sila maggamit niining “energy saver” devices.

Mahimo usab ang mga konsumidor pag-ukab sa ilang website sa www.veco.com.ph alang sa dugang kasayuran unsaon paggamit sa kuryente nga ekonomiya kaayo.

Dugang pa niini, ang Veco mas pabor kini nga gamiton ang Compact Fluorescent Lamp (CFL) kay makamenus kini kun itandi sa incandescent bulbs.

Sa pagka karon ang power supply sa Cebu-Negros-Panay grid nga gihulagway sa Veco nga anaa sa critical level ang matag usa ka konsumidor giawhag niini pag-abag kanila pinaagi sa pagdaginot sa paggamit sa kuryente aron malikayan ang power outage.   (Rey Pasaporte)(BANATNEWS)