Kapitan sa Bulacao nanion og armas

CEBU, Philippines - Si kapitan Raul Cabanero sa barangay Bulacao, dakbayan sa Talisay gipasanginlang nani-on og pusil samtang diha kini sa kalasbag sa ilimnong makahubog ngadto sa usa ka drayber sa habal-habal niadtong Biyernes sa gabii.

Ang biktimang mireklamo mao si Bhorly Llamedo, 31, nga taga barangay Candulawan kinsa gumikan sa kahadlok nga hunosan siya sa kinabuhi, mitaho ngadto sa Talisay City Police Station human sa maong hitabo.

Base sa imbestigasyon sa kapolisan, nasayran nga si Llamedo miparada sa iyang gimanehong motorsklo daplin sa karsada diha sa barangay Bulacao.

Si Cabanero kinsa giingong hubog, miduol ngadto kaniya ug sa walay igong rason milanit kini sa iyang armas de fuego ug gipunting pagtion ngadto sa biktima.

Si Llamedo nga puwerting lisanga mipasirit sa iyang motorsiklo ug misumbong sa kapolisan.

Kahinumdoman nga si Cabanero gipasanginlan usab kaniadto nga nani-on gihapon sa iyang armas ngadto sa usa ka guwardiya sa usa ka subdivision sa ibabaw’ng bahin sa iyang barangay apan ang maong pasangil ang gihimakak niini. (Brenda D. Batuto) (BANATNEWS)