CEBU, Philippines - Usa ka driver ug iyang kundoktor ang giimbestigar sa Regional Intelligence Division (RID) sa Police Regional Office (PRO-7) human nakuhaan og mga tag-as nga armas ang sulod sa ilang sakyanan niadtong milabay’ng gabii sa lungsud sa Consolacion. Ang duha giilang sila si Antonio Valdez, driver ug kundoktor niining si Melecio Vasquez, pulos taga dakbayan sa Danao sakay sa pasaheroang jeep nga may plakang GXA-382.
Una niini, sila si Chief Insp. Romeo Santander ug mga kaubanan sa RID nakadawat og impormasyon gikan sa ilang asset nga dunay armas nga isakay og pasaheroan paingon sa dakbayan sa Sugbu gikan sa Danao nga giingong gikarga sa usa ka gibana-banang 50-anyos nga dakuong lalaki.
Gumikan sa ka-apike sa oras giatangan nalang sa mga polis ang pasaheroan, apan dihang ilang napahunong wala na diha ang gihulagway nga lalaki sanglit giingong mikanaog kini diha palang sa Compostela dala ang mga utanon.
Nasakpan hinuon sa mga polis sulod sa usa ka sako ang usa ka KG-9 .9mm machine pistol, usa ka Ingram .9mm pistol, usa ka 357, usa ka .9mm pistol, tulo ka mga .45 caliber pistol, tulo ka .38 revolvers nga gibana-banang nagkantidad og P100 mil.
Sila si Valdez ug Vasquez ang hugot nga nanghimakak nga ilang kaila ang maong tiguwang ug wala gyud silay kasayuran niini dihang kini misakay sa terminal sa Danao. - Guam Logroño (BANAT NEWS)