CEBU, Philippines - Hingpit nang nakaangkon og kaugalingong edipisyo ang dugay nang nag-abang og opisina nga Regional Maritime Office-7 sugod karong Oktobre 9 sa alas 10 sa buntag diha bag-o nilang edipisyo ilawom sa Marcelo Fernan Bridge habig na sa barangay Pusok nga nagdugtong sa dakbayan sa Mandaue ug Lapulapu.
Si Sr. Supt., Agustin Molina, regional chief sa Maritime-7 nga nahinabi sa Banat News kagahapon nagkanayon nga unang higayon sa kasaysayan nga duna na gyud sila’y permanenteng buhatan sulod na sa pipila ka katuigan.
Matud ni Molina nga mokabat og P4 milyones ang gigahing kantidad ni Chief PNP Jesus Verzosa Jr. aron mahuman ang one- storey building ug duna usab kini boat house nga butangan sa ilang rubber boats ug uban pang gamit.
Matud ni Molina nga ang katumanan niini may labot sa panagtigom sa Mactan Cebu Bridge Management Board nga diin ang chairman nga si Gobernador Gwendolyn Garcia mihisgot nga kinahanglang may kaugalingong buhatan ang Maritime Group.
Ang luna nga gitukuran gipanag-iya sa Department of Public Works and Highways (DPWH) nga may gilapdong 1,000 metro kwadrado nga gamiton sulod sa 25 ka tuig ug mahimong ma-renew ang kasabutan. (Rey Pasaporte) (BANATNEWS)