Subway sa plaza hapit na mahuman

CEBU, Philippines - Ang Cebu South Coastal Road project nga gikontrato sa Kajhima Corporation (KC)hapit na mahuman kay ang gitrabaho nila karon mao nalang ang segment sa 3B-2 subway section, sumala pa ni Nilo Pamoylaon, ang project manager sa Department of Public Works and Highways (DPWH). Ang four-lane tunnel nga mitadlas sa ilawom sa Plaza Independencia (PI) nga nahimutang sa Fort San Pedro ug mulapos sa Sergio Osmeña road ang kanhi naila nga McArthur Boulevard. Sumala ni Pamoylaon nga ang orihinal nga disenyo niini dili tunnel kundili usa ka flyover apan ang maong plano nausab tungod kay maguba man ang karaang makasaysayanon kaayong plaza kun butangan nila kini og taytayan.

Hinuon gumikan sa kabatid sa mga enhinyero sa KC sayon ra kaayong gikubkob niini ang ilawom sa (PI) nga nabaniog kaayong napuno sa mga treasure sa mga Hapon. Kini tungod kay ang KC anad na kaayo sa pagpanghimo og tunnel ug gani milanat na og 170 ka tuig sila sa maong matang sa trabaho. Siya mitataw nga ang KC maoy adunay eksperensya sa paggama og mga tunnel sa tibuok kalibotan sanglit sulod na sa 170 ka tuig sa maong negosyo. - Rey B. Pasaporte (BANAT NEWS)