2 ginang tagak sa bung-aw 1 patay

CEBU, Philippines - Patay ang usa ka ginang ug kritikal usab ang kahimtang sa laing ginang nga daycare worker human mahulog sa kimba ang motorsiklo nga ilang gisakyan sa sitio Soc-ong barangay Monteller lungsod sa Alegria niadtong Huwebes sa alas 11:05 sa buntag.

Ang namatay mao ang nagmaneho sa motorsiklo nga si Marilyn Vicada Dumagil, 34, taga sitio Longpan, Monteller samtang ang angkas niining talandugon ang kahimtang mao si Nerilou Bayron, molupyo sa maong lugar ug daycare worker sa barangay.

Matud ni PO3 Leopoldo Tagalog sa Alegria Police dihang nahinabi sa Banat News ang duha gikan sa sitio Longpan sakay sa maong motorsiklo paingon sa Monteller proper.

Subay sa inisyal nga imbestigasyon gikatahong nawad-an og kontrol sa manobela si Marilyn ug nipadaplin og maayo sa karsada hinungdan nga gipikpik kini ni Bayron nga dili kaayo magpakusog ug magpadaplin kay basin madisgrasya.

Apan wala mopatuo ang drayber ug pag-abot sa maong lugar aksidente kining natagak sa kimba daplin sa karsada nga gibana-banang anaa sa tulo ngadto sa upat metros ang gilawmon ug kabatohan ang ubos. Ang duha ka mga sakay sa motor nga wala usab magsul-ob og helmet niadtong tungura maayong pagkatagak ug si Dumagil maayong pagkabunal sa ulo niini sa mga bato. Ang duha gidali pagdala sa Reinhard Memorial Hospital sa lungsod apan gideklarar nga dead on arrival si Dumagil samtang gibalhin sa tambalanan dinhi sa dakbayan sa Sugbo ang angkas niining si Bayron. (BANATNEWS)