P1M ihatag sa Lapulapu ngadto sa Cainta, Rizal

CEBU, Philippines - Giaprobahan sa konseho sa kagamhanan sa dakbayan sa Lapulapu ang P1 milyon nga gahin aron ihinabang sa mga biktima sa bagyong Ondoy sa kauluhan.

Atol sa sinemanang sesyon sa konseho, si Mayor Arturo Radaza mipadayag sa iyang intensiyon nga mohatag og hinabang ang lokal nga kagamhanan sa dakbayan sa Lapulapu ngadto sa mga nabiktima ni Ondoy.

Si Radaza nagkanayon nga sila mismo nakasaksi sa nahitabong trahedya atol usab sa ilang pagtambong sa ikatulo ug katapusang pagbasa sa Senate Bill 5007 niadtong Sityembre 28 sa hawanan sa Senado alang sa hingpit nga pagka-‘lone district’ sa Lapulapu.

Gumikan niini, si Radaza nagtinguha sa paghatag og hinabang pinansiyal ngadto sa mga biktima pinaagi sa usa ka resolusyon nga magtugot kaniyang mokuha og gahin gikan sa discretionary funds sa mayor.

 Gumikan niini, si Bise Mayor Mario Amores mipahimutang niini ngadto sa ilang "other matters" sa agenda diin ilang gikauyonan nga ang hatagan og hinabang sa Lapulapu mao ang Cainta, Rizal nga daghang panimalay ang naguba, kinabuhing nakalas ug ang uban missing pa hangtod niining panahona.

 Gipili sa konseho ang Cainta, Rizal nga maoy makabenepisyo sa hinabang sa Lapulapu inay nga ila kining itugyan sa National Disaster Coordinating Council (NDCC) diin dili na nila mamonitor kun hain na mahatag ang ilang donasyon.

Walay bisan usa nga misupak sa sugyot ni Radaza sa pagtabang sa mga biktima hinungdan nga ila kining giaprobahan in mass motion, lakip na ang mga konsehal sa oposisyon. (BANATNEWS)