Kapolisan seminaron bahin sa rabies

CEBU, Philippines - Ipaubos sa seminar ang kapulisan dinhi sa tunga-tungang Kabisay-an may kalabutan sa Akta Republika 9482 (Anti-Rabies Act of 2007) subay usab sa pagsaulog sa World Rabies Day karong adlawa nga nagdala sa tema nga “Register and Vaccinate Your Dog.” Ang Department of Veterinary Medicine and Fisheries (DVMF) ingon man ang Cebu Rottweiler Veterinary Association maoy mohatag og lecture sa kapulisan. Matud sa labaw sa DVMF, Doctor Alice Utlang, gikinahanglang masayod ang mga polis labot sa rabies tungod kay kini dunay mga iro gawas nga maoy tigpatuman sa balaud.

Nasayran nga duna nay mga kaso dinhi sa nasod labot sa mga sundawo ug mga polis nga namatay human mapaaki og iro nga dunay rabies.

Gawas sa ipahigayong lecture dunay film showing usab nga makita ang mga polis ug demonstration kung unsaon pag-train sa ilang mga iro.

Susamang kalihukan usab ang pasiugdahan sa DVMF diha sa City Central School nga tambungan sa mga molupyo sa dakbayan.

Laing kalihukan usab sa mga pet lovers ang ipahigayon karong hapon diha sa SM City Cebu duol sa V-Hire Terminal niini may kalabutan gihapon sa kasaulugan sa World Rabies Day. – BANAT NEWS