'Bombshell' nga mas dako sa Balili deal pabuthon

CEBU, Philippines - Dunay mas dakong bomba nga pabuthon ang naghiusang mga oposisyon dinhi sa lalawigan sa Sugbu batok kang Cebu Gov. Gwendolyn Garcia nga gihulagway nilang mas dako pa sa kontrobersiya karon sa Balili fiasco.

Si kanhi Senador John “Sonny” Osmeña uban nila ni Bogo Mayor Celestino “Junie” Martinez ug mga prominenteng sakop sa oposisyon sa panagtigom nila kagahapon sa buntag mihulagway nga ang ilang ‘bombshell’ makatay-og gyud sa pamunoan sa mga Garcia dinhi sa Sugbu.

Mibahad ang grupo nga kun di tumanon ang lakang nga pag-rescind sa kontrata sa Balili deal may pabuthong mas dakong bomba batok sa Kapitolyo ang ilang grupo.

“If majority of the board rejects the move of the group who wants to rescind and they sustain the contract we have a bombshell that we will explode, and that will be bigger than the Balili,” matud pang Sonny Osmeña.

Sumala pa niini ug midugang nga ang gihimo ni Rep. Pablo Garcia giisip na nilang ‘rehearsal’ unya sa pagdepensa sa naulahi sa iyang anak nga gobernador sa kasong plunder.

“Scared? Well you know Gwen is very quiet, nakamatngon ba mong hilom ra kaayo siya aning Balili?... Hadlok mo lang,” dugang pa sa kanhi senador.

Dihang gipangutana sa mga sakop sa media unsa ang gipasabot nilang “bombshell” gipasalig lang sa grupo nga mas dako pa kini sa Balili issue nga giatubang karon sa Kapitolyo sa pamunoan ni Garcia. – BANAT NEWS