Logarta gipasidunggan atol sa Press Freedom Week

CEBU, Philippines - Sa kataposang adlaw sa pagsaulog sa Press Freedom Week, kagahapon sa buntag gipahigayon ang pagbukas sa marker sa Jose Logarta Street diha sa barangay Linao, dakbayan sa Talisay.

Ang maong karsada adunay gitas-on nga 800 metros nga molapos ngadto sa Seaview Heights Subdivision ug sa sitio Pajo.

Si Logarta kinsa usa ka Talisaynon kanhi usa ka journalist diin nahimo kining editor sa kanhi pamantalaan nga Republic sulod sa 30 ka tuig ug namatay siya niadtong tuig 1987 sa sakit sa atay.

Ang konseho sa dakbayan sa Talisay mipasar og resolusyon sa pagpasidungog kang Logarta ug sa paghandom kaniya pinaagi sa paghingalan ubos sa iyang bansagon sa usa ka dalan diha sa barangay Linao.

Kagahapon ang asawa ni Logarta nga si Teodora kinsa nagpanuigon   na og 80-anyos nga usa ka kanhi Biology instructor sa Cebu State College (CSC) nga karon Cebu Normal University (CNU) ug ang iyang anak nga si Jose Logarta Jr. nga usa ka consultant sa World Bank ug Asian Bank nanambong usab sa maong kalihukan.

Lakip sa mitambong ang mga ig-agaw ni Logarta nga si Boy Abano kinsa 15 ka tuig nga nahimong konsehal kaniadto sa dakbayan sa Mandaue ug Ernie Logarta.

Ang pamilya ni Logarta mapasalamaton kaayo sa mga nagpasiugda sa paghatag og pasidungog ug paghandom sa mitaliwan na nga kanhi sakop sa media.

Si Atty. Pachico Seares, editor in chief sa Sunstar Daily, Aileen Mangubat, publisher sa Cebu Daily News, Michelle So, executive editor, ug hepe sa administration department sa Sunstar Daily, Divine Ngujo, community editor sa The Freeman ug Atty. Ruphil Bañoc, station manager sa RMN lakip usab nga nanambong.

Ang mga opisyal sa barangay nga gipangulohan ni kapitan Reynaldo Cedentario ug ang mga opisyal sa siyudad nga gipangulohan ni Mayor Socrates Fernandez didto usab.   BANAT NEWS