Sakop sa gang gipatay sa fratman

CEBU, Philippines - Usa ka batan-ong lalaki nga giingong sakop sa Bloods gang ang namatay human kini mabiktima sa pagpamusil sa laing batan-ong lalaki nga giingong sakop usab sa Alpha Kappa Rho (Akrho) sa sitio Pinahagbong sa barangay Subangdaku, dakbayan sa Mandaue.

Ang namatay giilang mao si Archie Sabaquilla, 19, ug ang suspetsado mao si Vincent Ramos, 22, ug managsilingan sa maong dapit apan giingong duna nay panagbingkil.

Si SPO3 Alfredo Andales, imbestigador sa kapolisan sa Presinto 2 sa Subangdaku nga nahinabi sa Banat News miingon nga si Sabaquilla sakop sa Bloods gang ug miyembro sa Akrho si Ramos.

Sumala pang Andales duha ka mga babayeng saksi nga pulos nagpuyo sa maong dapit miingon nga nagkita ang biktima ug suspetsado sa maong dapit ug kalit mitumaw ang panaglalis.

Sumala pang Andales base sa pamahayag sa mga babaye nagtinubagay og mahait nga pulong ang duha apan si Ramos wala na makapugong sa iyang kapungot kalit miibot sa giluklok nga armas ug gipusil ang biktima sa makadaghang higayon.

Ang biktima nahagba sa yuta ug nakaangkon og samad pinusilan sa tiil, abaga ug ulo nga maoy nakaingon sa hinanali niining kamatayon.

Matud pa ni SPO3 Andales nga ang mga sakop sa operations nga miresponde mao nay midala sa biktima sa Mandaue City District Hospital apan gideklarar kining dead on arrival.

Ang suspek nakaipsot sa gihimong hot pursuit operation samtang padayon pa ang imbestigasyon sa motibo sa maong pagpatay. BANAT NEWS