Duha ka sikat nga kanta gipa-ban sa FM station

CEBU, Philippines - Gisugdan sa pagpatuman ang resulosyon sa konseho sa siyudad sa Sugbu nga nag-ban sa pagpatukar sa kantang “Banana” ug “Nagmahal ako ng Bakla.”

Ang maong resolusyon sa konseho napasabot niadtong bulan sa Agusto ning tuiga nagdili sa pagtukar sa maong mga kanta sa kahanginan tungod sa kabastos sa lyrics niini. Ang pag-ban sa maong mga kanta sa mga FM station dinhi sa Sugbu gibasehan sa pagsaway usab sa mga miyembro sa Catholic Bishop Conference of the Philippines kon CBCP.

Sigon sa maong resolusyon, ang Konseho sa siyudad sa Sugbu misuporta sa panawagan sa Committee on Public Affairs sa CBCP ipa-ban ang maong kanta sa tanang mga FM station.

Kini kay dili maayo ang mga linya sa lyrics sa Banana nga gikanta sa grupong Blank Tape nga nagkanayon, “Sige i-try mo ang aking banana, pag natikman mo di magsasawa. Dahil masustansya ang aking banana at ubod pa ng sarap ang aking banana.”

Samtang sa kantang "Nagmamahal ako ng bakla" nga gikanta sa hiphop group nga Dagtang Lason nagkanayon nga “Mga tambay lang kami sawa sa babae, may mga babaeng manloloko, pinerahan lang kami kaya ngayon bakla na lang ang aming iibigin masarap magmahal ang bakla ohh sarap...damhin.”

Kini mga linyang giisip sa kaparian nga mga malaw-ay ug walay makuhang maayong leksyon ang kabataan.

Ang maong resolusyon gipang-apod-apod na ngadto sa tanang mga FM ug AM station aron dili na kini i-play sa kahanginan.

Ang Kapisanan ng mga Brodkasters ng Pilipinas kon KBP Cebu city Chapter pinaagi sa presidente niini nga si Carlo Dugaduga sa Aksyon Radyo misuporta sa maong resolusyon. – BANAT NEWS

Show comments