Gobiyerno gipahimangnoan transparent sa media

CEBU, Philippines - Gipahimangnoan ni Senador Francisco “Chiz” Escudero ang gobiyerno nga kinahanglang mahimong transparent sa media kun may kalabutan sa public interests.

Si Escudero namulong niini atol sa gipahigayong Citizen-Media Participation in 2010 Elections forum kagahapon alang sa nagpadayong mga kalihukan sa Cebu Press Freedom Week.

Ang mga organizers ug sponsors nagtinguha untang imbitaron sa maong forum ang tulo ka mga gidungog-dungog nga modagan pagka-presidente sa nasud sa 2010 nga sila si Escudero, si Defense Secretary Gilbert “Gibo” Teodoro ug Senador Benigno “Noynoy” Aquino. Si Escudero nagkanayon nga kinahanglang di mahadlok ang gobiyerno sa pakig-atubang sa media ug kinahanglang sila accountable sa ilang mga gipanghimo.

Matud pa niini nga ang media ug ang gobiyerno kinahanglang mahimong partner ug dili isipon sa gobiyerno nga iya ang media ug modiktar sa kun unsay buhaton niini.

Samtang gibutyag ni Escudero nga di niya suportahan ang balaudnong Right to Reply Bill nga naa na karon sa Senate Bicameral Committee tungod kay nagtuo siyang mamahimo kining babag sa kagawasan sa media.

“Any attempt to curtail the press freedom has been opposed not only by media but also by the people, history had shown it and it will fail,” sumala pang Escudero.

Apan bisan dili pabor niini si Escudero buot niyang hatagan gyud sa media og patas nga atensyon ug espasyo sa mga pahina o airtime slots sa balita ang tanang habig aron walay masagmuyo. - Edwin Ian Melecio (BANAT NEWS)