Demolisyon na pud - Speed

CEBU, Philippines - Ubay-ubay na usab nga mga illegal structures sa siyudad sa Sugbu ang gikatakdang i-demolish sa Squatters Prevention Encroachment and Elimination Division (SPEED).

Kini agi og pagtuman sa demolition order nga gipirmahan ni Mayor Tomas Osmeña sa wala pa molarga paingon ngadto sa Amerika.

Ang demolisyon sugdan   ugmang adlawa diha sa barangay Zapatera ning siyudad duol sa tunghaan sa maong barangay ug labing minos pito ka mga illegal structures nga gitukod diha sa nahisgutang dapit ang gitakdang panggub-on.

Matud sa labaw sa SPEED nga si Vicente Mercado, napadalhan na og notisya ang apektadong mga molupyo alang sa boluntaryong pagguba ug pagpahawa niini apan mapugos unya pag-demolish ang iyang mga sakop kung magpabilin pa sila sa maong lugar. Samtang unya sa sunod semana, laing mga illegal structures na usab ang i-demolish sa SPEED diha sa barangay Duljo-Fatima ilabi na ang 14 ka mga panimalay diha sa dalan B. Aranas Extension kansang mga tag-iya napadalhan na usab og notisya.

Matud pa ni Mercado nga ang apektadong mga residente nakalapas sa Building ug Civil Code sa nasod ug sa pipila ka ordinansa sa siyudad sama sa pagtukod og pinuy-anan nga walay building permit ug anaa usab nagpahiluna sa mga dapit nga wala itugot sa balaud. – BANAT NEWS