Kapitan sa Lawaan 1 ug urban poor husayon

CEBU, Philippines - Gitakdang atubangon karong adlawa ang duha ka grupo sa urban poor sa barangay Lawaan I, dakbayan sa Talisay ug ang ilang kapitan sa barangay aron husayon ang ilang panagbangi bahin sa gipatukod nga mga balay diha sa basketball court sa maong barangay.

Si Richel Bacaltos, Talisay City Administrator mibutyag sa Banat News nga ang husayon karon mao si Kapitan Jerson Laceda sa Lawaan I, ug ang mga lider sa duha ka grupo nga mao ang Lawaan Urban Poor Association (LUPA) ug ang Kalmar Urban Poor Community Association (KUPCA).

Si Bacaltos nagkanayon nga gusto sa siyudad nga mahusay ang duha ka grupo ning ilang bangi apan iyang gipasabot nga ang mga molupyo diha karon sa nahisgutang lugar nag-atubang og dakong risgo tungod kay dili sila maoy tag-iya sa yuta nga gitarokan sa ilang mga balay.

Kahinumdoman nga ang ulahing nabangian sa duha ka habig mao ang giingong pagtukod og mga balay sa mga sakop sa KUPCA diha sa basketball court nga gipangunahan sa ilang lider nga si Estrella Bas.

Sayo niini gipasanginlang gigisi-gisi ug gilud-an ni Bas ang suwat ni Mayor Socrates Fernandez nga nagmando sa pagpatangtang sa koral nga gitukod sa palibot sa basketball court sa wala pa kini tukori og mga balay. Si Bacaltos miingon nga gikonpirmar sa buhatan sa city engineering nga gipatukoran gyud og mga balay ang basketball court.

 Si Bacaltos midugang nga kagahapon sa hapon may gipadalang communication sa iyang buhatan gikan sa University of the Philippines (UP) kinsa maoy tag-iya sa yuta sa sitio Kalmar nga maoy dugokan sa panagbangi karon sa mga nagpuyo sa maong lugar.

 Kini may labot sa baruganan sa tagdumala sa UP bahin sa ilang butang nga gieskuwat karon sa mga tawo diha sa Kalmar.  - Brenda D. Batuto  (BANAT NEWS)