CEBU, Philippines - Misibog si Bise Mayor Carlo Pontico Fortuna sa iyang tinguhang mokandidato sa pagkakongresista sa ikaunom nga distrito sa lalawigan sa Sugbo ug nakahukom nga mobalik na lamang pagpasubli sa iyang katungdanan isip bise mayor sa dakbayan.
Si Fortuna mibutyag sa Banat News nga kini may kalambigitan sa pagpasaka og kaso ni Kapitan Glenn Bercede sa Ombudsman nga malversation of public fund sa miaging semana.
Si Fortuna miingon nga may bulok politika ang kasong gisang-at ni Bercede ug kini gihulagway niyang timaan nga nagdali paghupot sa iyang pwesto ang maong kapitan.
Nagtuo hinuon si Fortuna nga ang gihimo ni Bercede mao lamang ang pagtabon sa dakong anomaliya nga nalambigitan sa mga opisyal sa dakbayan pinangulohan ni Mayor Jonas Cortes.
“Kining tanan politika kay kini gihimo lang sa pagtabon sa dako gyod kaayong anomaliya sa Mandaue. Kay ang pagpasaka og kaso nahitabo lang ni human mogawas ang corruption sa housing materials sa nasunogan sa Umapad,” matud pa niini ug midugang nga di siya susama kanila nga mogamit og foul-play aron lang modaog. Sa nasayran, si 6th District Rep. Nerissa Soon-Ruiz kinsa anaa na sa katapusang termino miduso kang Fortuna nga maoy padaganon pagka-kongresista sa 2010 elections.
Si Provincial Board Member Victor Maambong sila si kanhi mayor Thadeo Ouano ug kanhi provincial board member Gabriel Luis Quisumbing nabaniog na usab nga modagan sa maong distrito. (BANATNEWS)