Panagsungi sa Tabunan susihon na sa ad hoc
CEBU, Philippines - Sugdan na sa gimugna nga Ad Hoc Committee sa konseho sa siyudad sa Sugbo ang pag-imbestigar sa kasungian tali sa mga mag-uuma sa barangay Tabunan ning dakbayan ug kang retired General Tiburcio Fusilero.
Ang nine-man committee nga gitahasan sa City Council pag-imbestigar sa kasungian gipanguluhan ni Konsehal Augustus Pe Jr.
Matud sa konsehal nga iya nang ipatawag ang mga sakop sa komitiba nga sila si Konsehal Hilario Davide III, Joey Daluz III, Nestor Archival, Richard Osmeña, Eugenio Faelnar, Roberto Cabarrubias, Eduardo Rama ug Edgardo Labella.
Gusto ni Pe nga mahan-ay na ang ilang buhatonon aron dunay direksyon ang himoon nilang imbestigasyon ug makab-ot ang tumong sa komitiba.
“Ang importante man gud ang objective since kining problemaha gabalik-balik na man lang ni naa gyo'y klarong direksyon ang imbestigasyon,” sumala ni Pe.
Ang komitiba gitahasan pagsusi sa reklamo sa mga residente, mopahigayon og fact-finding investigation ug morekomendar og aksyon.
Makapila na ireklamo sa mga molupyo sa barangay Tabunan nga sila gihasi ni Fusilero ug gidid-an nang makatikad sa ilang mga uma.
Kini human usab mopirma og kasabutan ang retiradong heneral tali sa Department of Environment and Natural Resources (DENR) niadtong tuig 2000 ug gisangunan kini pagpatuman og reforestation project sa protected areas nga naglakip sa yuta diha sa nahisgutang barangay.
Apan ang mga mag-uuma mialegar nga gihasi sila sa mga tawo niini nga nagdili na nila pagtikad sa ilang umahan. – BANAT NEWS
- Latest
- Trending
