CEBU, Philippines - Nabuslot ang bagolbagol sa usa ka tawo dihang gipusil sa iyang silingan samtang nagtan-aw og disko didto sa sitio Molave Extension, barangay Tabunok, dakbayan sa Talisay kagahapon sa kaadlawon.
Ang biktima giila sa mga polis nga si Julius Rodriguez, hingkod nga taga Molave, samtang ang suspetsado mao usab si Dominador Nacario, 37, taga barangay Tabunok.
Si SPO3 Cleopas Bonjoc, duty desk officer sa Talisay City Police Station nga nahinabi sa Banat News kagahapon mibutyag nga dihang ilang giimbistigar ang suspetsado human hidakpi sa mga maabtik nga polis sa Talisay, wala kini makatug-an sa hinungdan sa iyang pagpusil sa biktima.
Kini sa dihang gidala sa kapolisan si Nacario ngadto sa tambalanan diin si Rodriguez nahimutang ug didto gitumbok ni Rodriguez si Nacario nga mao gyu'y mipusil kaniya.
Si Rodriguez igo lang nagtan-aw sa makalingaw kaayong sinayaway sa mga nanisko atol sa kasaulogan sa piyesta sa ilang lugar dihang kalit lang mitungha ang suspetsado nga nagbitbit og armas de fuego ug sa walay pupangutana giluthang ang biktima.
Si Nacario nagpahayahay na karon sa prisohan ug gipaabot ang kiha nga isang-at sa biktima batok kaniya. – BANAT NEWS