CEBU, Philippines - Patay diha-diha dayon ang usa ka lalaki human kini naguroy ug nalatayan sa usa ka Isuzu prime mover pasado alas-9 sa miaging gabii sa East Osmeña Cabahug Street ning dakbayan.
Ang maong lalaki nga naguroy nailhan sa ngalan nga Jesus Flores, molupyo sa Ramona Village, Dawis syudad sa Talisay samtang ang drayber sa truck nga nakaligis nailhan nga si Pablo Gintapa Jr.,31, molupyo sa Lamac, Pinamungajan.
Matud pa ni Manuel Tagaan sa Investigation section sa Traffic sa pakighinabi sa Banat News nasayran nga si Gintapa igo nalang nakabantay nga may milagapak sa iyang mga ligid ug sa iyang paminaw dunay nag-ungot sa ilawom maong mihunong siya og padagan sa trak.
Dihang iyang gisusi sa ilawom maoy mitagbo sa iyang mga mata ang patay'ng lawas sa biktima ug motorsiklo nga nalatayan sa ilawom.
Butyag usab ni Gintapa sa kapolisan nga wala siya makabantay kun asa naggikan ang motor sa biktima.
Si Gintapa gikatakdang pasakaan og kasong reckless imprudence resulting to homicide. – BANAT NEWS